Þann 4. maí síðastliðinn gerðu Vísindavefur Háskóla Íslands og Alþingi með sér samning um uppsetningu og rekstur upplýsingavefs um Evrópusambandið og Evrópumál. Evrópuvefurinn var opnaður formlega á Háskólatorgi í dag.
Tilgangur Evrópuvefsins er að veita veita málefnalegar og óhlutdrægar upplýsingar um Evrópusambandið og Evrópumál og verður uppsetning og framsetning efnis með svipuðu móti og á Vísindavefnum. Á vefnum verður hægt að spyrja spurninga um allt sem viðkemur Evrópusambandinu og Evrópumálum. Starfsmenn vefsins munu svara spurningunum ýmist sjálfir eða leita til fræðimanna á viðkomandi sviði.
Aðalritstjóri Evrópuvefsins er Þorsteinn Vilhjálmsson prófessor emeritus í vísindasögu og eðlisfræði, ritstjóri Vísindavefsins 2000-2010. Aðrir starfsmenn eru Vilborg Ása Guðjónsdóttir MA í alþjóðasamskiptum og Þórhildur Hagalín MA í Evrópufræðum. Í ritstjórn eru auk ritstjóra þau Erna Bjarnadóttir hagfræðingur, Margrét Einarsdóttir lögfræðingur og Sverrir Jakobsson sagnfræðingur. Framkvæmdastjóri Evrópuvefsins er Jón Gunnar Þorsteinsson ritstjóri Vísindavefsins. Vefstjóri Evrópuvefsins er Guðmundur Daði Haraldsson.
Á vefsetri Evrópuvefsins er nú þegar talsvert efni til að skoða og yfirleitt verður bætt við nokkrum svörum á hverjum virkum degi. Veffangið er http://evropuvefur.is/.