Kynjafræði beitt til að greina áleitin viðfangsefni samtímans

Hildur Fjóla Antonsdóttir, verkefnisstjóri á Rannsóknastofu í kvenna- og kynjafræðum.

Rannsóknastofa í kvenna- og kynjafræðum við Háskóla Íslands (RIKK) boðar til alþjóðlegrar ráðstefnu dagana 4.–5. nóvember 2011 við Háskóla Íslands. Hildur Fjóla Antonsdóttir, verkefnisstjóri hjá RIKK, var tekin tali á afmælisvef skólans. 

Þátttaka 90 fræðimanna af ólíkum fræðasviðum

„Alþjóðleg ráðstefna RIKK er fimmta stóra ráðstefnan um kvenna- og kynjarannsóknir sem fer fram við Háskóla Íslands, en að þessu sinni er hún  jafnframt haldin í tilefni af 20 ára afmæli stofnunarinnar og 100 ára afmæli Háskólans,“ segir Hildur Fjóla og bætir við að í ár skiptist ráðstefnan í 20 málstofur með þremur lykilfyrirlesurum innanborðs.  

„Um 90 fræðimenn og sérfræðingar af ólíkum fræðasviðum munu taka þátt. Fjallað verður um allt milli himins og jarðar er viðkemur kynjafræðum, t.a.m.: Dominique Strauss-Kahn málið, uppgjörið við hrunið, konur í skáldskap karla, Tobbu Marinós og bókmenntastofnunina, hernámssögur og ástandskonur, ítalska kvenfútúrista, kynjajafnrétti í Kína, eldhúsið sem pólitískt rými, villimenn og víkinga, konur í friðargæslunni, eiginkonur föðurlandssvikara, og sögur 13 rauðsokka,“ segir Hildur Fjóla. 

Hildur bendir á að RIKK eigi í samstarfi við fjölda aðila vegna ráðstefnunnar en hún sé haldin í samvinnu við Reykjavíkurborg, umhverfisráðuneytið, Jafnréttisstofu, Kvennasögusafnið, Alþjóðamálastofnun, Stofnun Sæmundar fróða, EDDU – öndvegissetur og Alþjóðlegan jafnréttisskóla við Háskóla Íslands.

Áleitin viðfangsefni samtímans

„Við val á lykilfyrirlesurum var ákveðið að bjóða fræðimönnum á heimsmælikvarða af ólíkum fræðasviðum sem allir eiga það sameiginlegt að beita kynjafræðinni til að greina áleitin viðfangsefni samtímans. Ég vil líka vekja athygli á sérstakri öndvegismálstofu til minningar um framlag kvenna til stofnunar Háskóla Íslands og í tilefni af aldarafmæli laga um rétt kvenna til náms og embætta. Í málstofunni verður leitað svara við spurningunni: Hverju hefur menntun kvenna skilað? Málstofan er haldin í samstarfi við Kvennasögusafnið og Jafnréttisstofu,“ segir Hildur Fjóla. 

„Strauss- Kahn málið áhugavert“

Ef ég yrði að nefna einn fyrirlestur sem ég myndi alls ekki vilja missa af þá yrði það fyrirlestur Cynthiu Enloe um Strauss-Kahn málið. Strauss-Kahn málið fór vart framhjá neinum en umræðan í fjölmiðlum samanstóð mikið til af fullyrðingum um hvort þeirra væri trúverðugra, herbergisþernan eða framkvæmdastjóri Alþjóðagjaldeyrissjóðsins. Í fyrirlestri sínum mun alþjóðastjórnmálafræðingurinn Enloe aftur á móti kafa dýpra og sýna hvernig femínísk greining á Alþjóðagjaldeyrissjóðnum, franskri stjórnmálamenningu og bandarísku réttarkerfi getur varpað skýrara ljósi á málið,“ segir Hildur Fjóla að lokum. 

-----------------------------------------------------------------------------------------------

Hér er dagskrá ráðstefnunnar aðgengileg: 

Hér eru upplýsingar um þrjá lykilfyrirlesara ráðstefnunnar:

Cynthia Enloe, stjórnmálafræðingur og prófessor við Clark-háskóla í Bandaríkjunum: The Strauss-Kahn Affair: The Cultures and Structures of Masculinity
Enloe er heimsþekkt fyrir femíníska greiningu sína á hervæðingu, stríðum, stjórnmálum og hnattvæðingu efnahagskerfa og hefur stundað rannsóknir í Írak, Afganistan, Bandaríkjunum, Bretlandi, Japan, Filippseyjum, Kanada, Chile og Tyrklandi. 

Joni Seager, prófessor í hnattrænum fræðum við Bentley-háskóla í Boston: Death by Degrees: Making Feminist Sense of the 2° Climate Change Target. Seager stundar femínískar rannsóknir á sviði landfræði, alþjóða- og umhverfismála. Hún er afkastamikil fræðikona og hefur birt fjölda greina og bóka. Meðal bóka hennar er The Penguin Atlas of Women in the World  sem hefur fengið mjög góða dóma og unnið til verðlauna. Hún hefur einnig starfað sem ráðgjafi hjá Sameinuðu þjóðunum og unnið þar að verkefnum er varða umhverfismál og stefnumótun í vatnsmálum.

Beverly Skeggs, prófessor í félagsfræði við Goldsmiths, London-háskóla:Rethinking Respectability: the moral economy of person value? Skeggs er höfundur bókanna Formations of Class and Gender: Becoming Respectable Class, Self, Culture og Feminism after Bourdieu. Hún hefur fært rök fyrir mikilvægi stéttar í mótun kynjaðra sjálfsmynda og því gildi sem einstaklingum er gefið í samtímamenningu.

Ráðstefnunefndina skipa: Annadís G. Rúdólfsdóttir, námsstjóri Alþjóðlegs jafnréttisskóla við Háskóla Íslands og doktor í félagssálfræði, Anna Karlsdóttir, lektor í landafræði og ferðamálafræði, Guðni Elísson, prófessor í almennri bókmenntafræði, Ingólfur Ásgeir Jóhannesson, prófessor í menntunarfræðum, Irma Erlingsdóttir forstöðumaður RIKK og framkvæmdastjóri EDDU - öndvegisseturs, og Kristín Björnsdóttir prófessor í hjúkrunarfræði. 

deila á facebook