Frá 64 nemendum upp í 5400 á ári
Fjöldi góðra gesta fagnaði 40 ára afmæli Endurmenntunar Háskóla Íslands þegar hátíðarhöld fóru fram í húsnæðinu að Dunhaga 7 fimmtudaginn 12. október. Frumkvöðlar að stofnun Endurmenntunar voru heiðraðir við sérstaka hátíðarathöfn. Tónlistarkonurnar Elín Ey og DJ Dóra Júlía sáu um ljúfa tóna á hátíðinni. Eftir athöfnina tók við afmælisveisla þar sem starfsfólk og gestir áttu ánægjulega stund og rifjuðu upp mikilvæga tíma í sögu Endurmenntunar.
Auk Höllu Jónsdóttur Endurmenntunarstjóra fluttu hátíðarræður þau Jón Atli Benediktsson, rektor HÍ, Guðríður Þorsteinsdóttir lögfræðingur, fyrrverandi framkvæmdastjóri BHM og skrifstofustjóri í heilbrigðisráðuneytinu og Guðmundur Magnússon, fyrrverandi prófessor í hagfræði og rektor Háskóla Íslands árin 1979-1985.
Frumkvöðlar fengu afhentan þakklætisvott fyrir sitt framlag til starfs Endurmenntunar:
- Arnlaugur Guðmundsson Tæknifræðingur og fyrrverandi formaður endurmenntunarnefndar TFÍ
- Guðbrandur Steinþórsson Verkfræðingur og fyrrverandi rektor Tækniskólans
- Guðmundur Magnússon Fyrrverandi prófessor í hagfræði og rektor HÍ 1979-1985
- Guðríður Þorsteinsdóttir Lögfræðingur og fyrrverandi framkvæmdastjóri BHM
- Kristján Thorlacius Fyrrverandi framhaldsskólakennari og fulltrúi Hins íslenska kennarafélags
- Margrét S. Björnsdóttir Fyrsti starfsmaður Endurmenntunar og forstöðumaður fyrstu 16 árin
- Oddur B. Björnsson Verkfræðingur og fyrrverandi formaður menntamálanefndar Verkfræðingafélags Íslands
- Þorsteinn Helgason Prófessor emeritus við menntavísindasvið HÍ og fyrrverandi fulltrúi Hins íslenska kennarafélags
![Frumkvöðlarnir sex af sjö sem gátu verið viðstödd](/sites/dev-aldarafmaeli.hi.is/files/styles/photo_small/public/2024-01/frumkvodlar.jpg?h=10d202d3&itok=FLpaS86K 479w, /sites/dev-aldarafmaeli.hi.is/files/styles/photo_medium/public/2024-01/frumkvodlar.jpg?h=10d202d3&itok=2nj80Hox 480w, /sites/dev-aldarafmaeli.hi.is/files/styles/photo_large/public/2024-01/frumkvodlar.jpg?h=10d202d3&itok=pFPpxLYK 768w, /sites/dev-aldarafmaeli.hi.is/files/styles/photo_extra_large/public/2024-01/frumkvodlar.jpg?h=10d202d3&itok=4HaB-682 1024w, /sites/dev-aldarafmaeli.hi.is/files/styles/photo_full/public/2024-01/frumkvodlar.jpg?h=10d202d3&itok=qPZIVsL5 1440w)
Frumkvöðlarnir sex af sjö sem gátu verið viðstödd. MYND/Olga Björt Þórðardóttir:
Merkileg saga
Frumkvæðið að starfsemi Endurmenntunar kom úr atvinnulífinu, nánar tiltekið frá Tæknifræðingafélagi Íslands. Félagið hafði haldið námskeið fyrir sitt fólk með ærinni fyrirhöfn og hóf að kanna möguleika á að stofna til samstarfs við önnur félög háskólamanna um endurmenntun. Úr varð að Verkfræðingafélag Íslands, Tæknifræðingafélag Íslands og Hið íslenska kennarafélag auk BHM, Háskóla Íslands og Tækniskólans undirrituðu í lok árs 1982 samstarfssamning um sameiginlega endurmenntunarnefnd. Markmiðið með starfseminni var:
- Að sinna þörfum starfandi háskólamanna fyrir endurmenntun með námskeiðum, fræðslufundum og útgáfustarfsemi. Í samvinnu og samráði við hlutaðeigandi deildir, námsbrautir og stofnanir Háskólans og Tækniskólans svo og viðkomandi félög háskólamanna.
- Að sinna fræðslu fyrir almenning eftir því sem aðstæður leyfa og í samráði við aðila samnings.
Margrét S. Björnsdóttir félagsfræðingur var ráðin til starfa fyrir Endurmenntunarnefnd sumarið 1983. Stjórn starfseminnar var skipuð af háskólaráði og í henni sátu 10 aðilar - 5 úr Háskóla Íslands og 5 frá öðrum aðilum skv. tilnefningum þeirra. Kennsla hófst í húsnæði HÍ við Nóatún 17 haustið 1983 og fyrsta námskeiðið var Tölvur og gagnavinnsla. Starf endurmenntunarnefndar vatt fljótt upp á sig. Þátttakendur á námskeiðum fyrsta haustið voru 64, árið eftir um 600 og árið 1990 voru þátttakendur um 3000.
Halla Jónsdóttir Endurmenntunarstjóri, Jón Atli Benediktsson, rektor Háskóla Íslands, og Oddný Sverrisdóttir, prófessor við Háskóla Íslands og stjórnarmeðlimur hjá Endurmenntun, fluttu öll ávörp á afmælishátíðinni.
![Halla Jónsdóttir Endurmenntunarstjóri, Jón Atli Benediktsson, rektor Háskóla Íslands, og Oddný Sverrisdóttir, prófessor við Háskóla Íslands og stjórnarmeðlimur hjá Endurmenntun, fluttu öll ávörp á afmælishátíðinni.](/sites/dev-aldarafmaeli.hi.is/files/styles/squared_small/public/2024-01/kri_ehi_40ara_231012_016_0.jpg?h=4362216e&itok=V0YoqLah 479w, /sites/dev-aldarafmaeli.hi.is/files/styles/squared_medium/public/2024-01/kri_ehi_40ara_231012_016_0.jpg?h=4362216e&itok=fs6slSOq 480w, /sites/dev-aldarafmaeli.hi.is/files/styles/squared_large/public/2024-01/kri_ehi_40ara_231012_016_0.jpg?h=4362216e&itok=KHxJyi-L 768w)
Nýtt nafn og ör þróun símenntunar
Endurmenntunarstofnun Háskóla Íslands varð sem slík með lagabreytingu árið 1991 og starfsmenn fjórir. Fyrsta húsnæðið var að Nóatúni 17 þar til starfsemin var flutt í nýbyggðan Tæknigarð á Háskólasvæðinu árið 1987 og síðar í núverandi húsnæði við Dunhaga 7.
Að jafnaði starfa um 20 manns hjá Endurmenntun HÍ og kennsla í gangi í húsinu flesta daga og kvöld, einnig laugardaga. Endurmenntun býður sem fyrr upp á fjölbreytt námsframboð; lengra og styttra nám, starfstengt nám og fræðslu fyrir almenning, fjarnám og staðnám. Árið 2022 stunduðu um 600 manns nám á 7 námsbrautum. 5400 manns sóttu um 300 námskeið í fyrra sem alls 373 kenndu í samstarfi við Endurmenntun.
Segja má að markaðurinn sem Endurmenntun starfar á hafi umbylst á síðustu árum. Tækniþróunin hefur gjörbreytt því hvernig við lærum og hvernig við kennum. Stuðningur atvinnulífs og stéttarfélaga við símenntun er meiri en áður, námsformið er orðið fjölbreyttara og kröfur fólks um val eru miklar. Þessar breytingar hafa haft í för með sér sprengingu í framboði sí- og endurmenntunar af ýmsu tagi.
Staða Endurmenntunar HÍ í dag er best lýst í hluta ræðu Höllu Jónsdóttur Endurmenntunarstjóra: „Við lítum svo á að við höfum það hlutverk að bæta samfélagið, ekki bara með því að efla þekkingu hæfni fólks heldur einnig með því að tengja fólk og skapa tækifæri. Það er enn eftirspurn eftir því að koma saman og læra og samfélagið þarf á því að halda að enn sé boðið upp á slíkan vettvang. Um leið og við færum nám og ýmislegt annað í tölvuna og símana er okkur tíðrætt um einmanaleika, einangrun og samskiptavanda samfélagsins. Þetta er allt eitt stórt samhengi. Hjá Endurmenntun ætlum við klárlega að hlusta á kröfur um aðgengi að námi fyrir öll á þeim tíma sem hentar og þeim stað sem hentar. En við ætlum líka að halda áfram að vera vettvangur tengsla, samveru og samtals þegar það á við. Það er mikilvægur liður í okkar framlagi til betra samfélags.“
„Endurmenntun hefur verið lykilþáttur í starfi Háskóla Íslands á umliðnum fjórum áratugum og ég er sannfærður um að mikilvægi Endurmenntunar í starfi skólans eigi enn eftir að aukast á komandi árum. Það er von mín að þegar haldið verður upp á hálfrar aldar afmæli Endurmenntunar eftir tíu ár hafi hún styrkt stöðu sína enn frekar í íslensku samfélagi á grundvelli enn nánara samstarfs við deildir og fræðasvið skólans og miðlæga stjórnsýslu. Fyrstu fjörutíu árin gefa svo sannarlega tilefni til bjartsýni,“ sagði Jón Atli Benediktsson, rektor Háskóla Íslands, enn fremur í ræðu sinni á afmælishátíðinni.
Fleiri myndir frá afmælishátíðinni má finna á vef Endurmenntunar HÍ.
Forstöðukonur Endurmenntunar frá upphafi, Margrét S. Björnsdóttir, Halla Jónsdóttir og Kristín Jónsdóttir Njarðvík. MYND/Olga Björt Þórðardóttir
![Forstöðukonur Endurmenntunar frá upphafi, Margrét S. Björnsdóttir, Halla Jónsdóttir og Kristín Jónsdóttir Njarðvík.](/sites/dev-aldarafmaeli.hi.is/files/styles/squared_small/public/2024-01/forstodumenn-ehi.png?h=1e66e246&itok=fxRIRhQy 479w, /sites/dev-aldarafmaeli.hi.is/files/styles/squared_medium/public/2024-01/forstodumenn-ehi.png?h=1e66e246&itok=1WlDxIhn 480w, /sites/dev-aldarafmaeli.hi.is/files/styles/squared_large/public/2024-01/forstodumenn-ehi.png?h=1e66e246&itok=lPN3DGIa 768w)