Lögberg er ein af þekktari byggingum Háskóla Íslands, hvílir á milli Nýja-Garðs og Háskólatorgs og hýsir jafnt lögfróða kennara sem lögþyrsta stúdenta. Í Lögbergi kennir ýmissa grasa, allt frá bóksölu Úlfljóts, sem er í kjallara byggingarinnar, yfir í lesstofu lögfræðinema. Hún er líklega með þaulsetnari lesstofum á háskólasvæðinu. Ekki má gleyma rúsínunni í pylsuendanum, dómsalnum sjálfum.
Inni á milli kennslustofa, fyrirlestrasala og kontóra er sum sé fullbúinn réttarsalur í Lögbergi. Þar geta stúdentar mátað bláu skikkjurnar, kankast á við skjólstæðinga sína og flutt sýndarmál sem annaðhvort enda með sýknu eða sekt. Þá eru brögð að því að stúdentar setji á svið fræg dómsmál úr samtímanum.
Lagastúdínan Brynhildur Bolladóttir segir dómsalinn gegna mikilvægu hlutverki í sínu laganámi. „Þegar námið er algjörlega að buga mig læðist ég inn í réttarsalinn, máta bláu skikkjuna og læt mig dreyma um að ég sé að flytja stórt prófmál fyrir Hæstarétti. Á meðan fylgist þjóðin öll með og hugsar: Hvaða stúlka er þetta með brúnu krullurnar sem lætur ekkert stöðva sig? Við þetta hellist lærdómsandinn aftur yfir mig.“
