1986
75 ára afmæli Háskólans
Myndasyrpan hér fyrir neðan er frá 75 ára afmælishátíð Háskóla Íslands sem haldin var í Háskólabíó.
Háskóli Íslands 75 ára
Heimildarmynd sem gerð var árið 1986, í tilefni af 75 ára afmæli Háskóla Íslands
Félagsvísindastofnun tekur til starfa
Félagsvísindastofnun Háskóla Íslands tekur til starfa. Markmið stofnunarinnar hefur frá upphafi verið að efla félagsvísindi á Íslandi með því að annast hagnýtar og fræðilegar rannsóknir, auk þess að kynna almenningi gagnsemi rannsókna á sviði félagsvísinda.
Fyrsta tilraun hérlendis með fjarkennslu
Gerð er fyrsta tilraun hérlendis með fjarkennslu í formi gagnvirks sambands í sjónvarpi við Háskóla Íslands.
Í marsmánuði 1986 fór fram hin fyrsta tilraun hérlendis með fjarkennslu í því formi að haft væri gagnvirkt samband við fólk á Akureyri.
Hlýtur heiðursdoktorsnafnbót fyrst kvenna
Anna Sigurðardóttir, stofnandi og þáverandi forstöðumaður Kvennasögusafns Íslands, hlýtur, fyrst kvenna, heiðursdoktorsnafnbót við heimspekideild Háskóla Íslands. Við sama tækifæri var Margrét Þórhildur Danadrottning sæmd heiðursdoktorsnafnbót við háskólann.
Rannsóknaþjónusta Háskólans stofnuð
Rannsóknaþjónusta Háskólans tekur til starfa. Meginmarkmiðið er að stuðla að eflingu samstarfs atvinnulífs og skóla. Rannsóknaþjónustan leitast við að styrkja tengsl Háskóla Íslands og atvinnulífs á sviði rannsókna, nýsköpunar og hæfnisuppbyggingar. Tilgangur þessara tengsla er að veita íslensku atvinnulífi stuðning á sem flestum sviðum og styrkja um leið starfsemi Háskóla Íslands. Á starfsvettvangi Rannsóknaþjónustunnar er áhersla lögð á þekkingu, nýsköpun og alþjóðlegt samstarf.
Handritasérfræðingar virða fyrir sér Konungsbók Eddukvæða
Handritasérfræðingar virða fyrir sér blöð úr Konungsbók Eddukvæða, einhverju merkasta skinnhandriti norrænu, í tilefni af væntanlegri útgáfu handritsins tengdri 75 ára afmæli Háskóla Íslands þetta ár.
Eðlisfræðingur við störf sín á Raunvísindastofnun
Þorsteinn Sigfússon eðlisfræðingur við störf sín á Raunvísindastofnun 1986. Á myndinni sést tölvustýrt neistaskurðtæki til sýnagerðar í þéttefnisfræði, smíðað á stofnuninni. Ljósmynd - Ævar Jóhannesson - Úr afmælisriti Raunvísindastofnunar 1986.
Myndin er tekin á 20. starfsári Raunvísindastofnunar og þar sést Þorsteinn Sigfússon eðlisfræðingur við störf sín.
Menntastofnun við HÍ stofnuð í tilefni af aldarafmæli Sigurðar Nordals
Menntastofnun við Háskóla Íslands stofnuð í tilefni af aldarafmæli Sigurðar Nordals prófessors 14. september þetta ár. Hlutverk hennar var að efla hvarvetna í heiminum rannsóknir og kynningu á íslenskri menningu að fornu og nýju og tengsl íslenskra og erlendra fræðimanna á því sviði. Stofnunin, sem síðar fékk nafn Sigurðar Nordals, er nú hluti af Stofnun Árna Magnússonar í íslenskum fræðum. Stofa Sigurðar Nordals, eða alþjóðasvið Stofnunar Árna Magnússonar í íslenskum fræðum, er til húsa í Þingholtsstræti 29.
