1989

Alþjóðaskrifstofa Háskóla Íslands stofnuð

Alþjóðaskrifstofa Háskóla Íslands stofnuð þetta ár. Hún sá um formleg samskipti skólans við erlenda háskóla, samninga þar að lútandi, stúdenta- og kennaraskipti. Með samningi sem undirritaður var árið 1992 tók Háskóli Íslands jafnframt að sér rekstur Alþjóðaskrifstofu háskólastigsins, þar sem skrifstofunni var falið að sinna alþjóðasamskiptum íslenska háskólastigsins alls. Í tengslum við Alþjóðaskrifstofu háskólastigsins er rekin Upplýsingaþjónusta um nám erlendis. Hún hefur m.a. umsjón með Erasmus- og Nordplus-skiptiáætlununum.

Vinnumatssjóður stofnaður

Vinnumatssjóður stofnaður þetta ár. Sjóðurinn umbunar félagsmönnum sem sýnt hafa árangur í rannsóknum í samræmi við mat á ritverkum þeirra. Birtar greinar og rit eru metin til stiga og fari afköst yfir tiltekin mörk öðlast viðkomandi hlutdeild í vinnumatssjóði í samræmi við stigafjölda. Sjóðurinn hefur frá upphafi stuðlað að verulega aukinni ritvirkni háskólamanna og hefur gert þeim hægara um vik að draga úr vinnu utan háskólans til að geta í auknum mæli einbeitt sér að rannsóknum.

Efna- og líftæknihúsið byggt á Keldnaholti

Efna- og líftæknihúsið byggt á Keldnaholti. Því var ætlað að skapa vettvang fyrir rannsóknir og þróunarstarfsemi í líftækni.

Stofnanir á árinu

Hagfræðistofnun Háskóla Íslands stofnuð með reglugerð dagsettri 28. mars þetta ár.

Einnig er Sjávarútvegsstofnun Háskóla Íslands stofnuð 8. júní þetta ár með reglugerð settri af menntamálaráðuneytinu.