1936
Stúdentar og verkamenn sem unnu við að grafa grunn háskólabyggingar
Stúdentar og aðrir verkamenn sem unnu við að grafa grunn háskólabyggingar síðsumars 1936. Myndin tekin við stúdentagarðinn. Guðjón Klemensson læknir átti myndina.
Alþingi samþykkir beiðni nemenda
Alþingi samþykkir beiðni nemenda heimspekideildar sem fóru fram á að þeir fengju einkarétt á kennaraembættum í íslenskri sögu, tungu og bókmenntum við ríkisskólana. Áður höfðu nemendur deildarinnar ekki haft forgang að störfum hjá ríkinu.
Ný heildarlög um Háskóla Íslands
Konungur undirritar ný heildarlög um Háskóla Íslands í byrjun febrúar, hin fyrstu frá upphaflegum lögum frá árinu 1909. Í nýju lögunum var kveðið á um fimmtu deildina við háskólann, atvinnudeild. Bygging húss fyrir atvinnudeildina, norðan við Aðalbyggingu, hófst um sumarið.
Stjórnarnefnd Árnastofnunar í Kaupmannahöfn
Stjórnarnefnd Árnastofnunar í Kaupmannahöfn, Den Arnamagnæanske Kommission, með fulltrúum frá Háskóla Íslands. Nefndin er hér á fundi 14. september 1936.
Sitjandi frá vinstri:
- Axel Lindvald
- Árni Pálsson
- Carl S. Petersen
- Sigurður Nordal (sem hefur átt fimmtugsafmæli þennan dag).
Standandi frá vinstri:
- Jón Helgason
- Ejnar Munksgaard bókaútgefandi
- Johannes Brøndum-Nielsen
- Einar Arnórsson
- Erik Arup, formaður nefndarinnar.
Á myndina vantar Halldór Hermannsson og Paul Nørlund.
Grunnur að Aðalbyggingu
Hornsteinn var lagður að Aðalbyggingu á hátíðisdegi stúdenta, 1. desember. Fjölmiðlar hömpuðu þessum merkisviðburði og tengdu hann við þjóðfrelsisbaráttu Íslendinga. Morgunblaðið minnti lesendur líka á þá staðreynd að byggingin ætti að verða fullgerð árið 1940, eða á sama tíma og hefja mátti endurskoðun sambandslagasamningsins frá árinu 1918.
Vinna í grunni Háskólabyggingarinnar 1936
