1937
Háskólahúsið í byggingu
Háskólahúsið í byggingu sumarið 1937. Búið er að steypa upp 1. hæðina og sjást menn þar á plötunni. Atvinnudeildarhúsið, sem þarna sést, hafði verið byggt skömmu áður. Í litla húsinu norðan við nýbygginguna (vinstra megin við hana á myndinni) mun hafa verið búið á þessum tíma og fyrr.
Atvinnudeildarhúsið vígt
Atvinnudeildarhúsið. Hönnuðir: Guðjón Samúelsson, þáverandi húsameistari ríkisins ásamt Bárði Ísleifssyni.
Atvinnudeildarhúsið vígt við hátíðlega athöfn í byrjun háskólaárs haustið 1937. Húsið var byggt fyrir happdrættisfé. Þar áttu aðallega að fara fram hagnýtar rannsóknir tengdar landbúnaði, sjávarútvegi og iðnaði en húsið var einnig notað til efnafræðikennslu læknanema. Háskólayfirvöld gerðu þá kröfu að skólinn fengi yfirráð yfir atvinnudeildinni. Hún varð þó aldrei að raunverulegri háskóladeild. Stofnunin fluttist síðar í áföngum af háskólasvæðinu.
Hugmynd um trjástíga
Alexander Jóhannesson rektor varpar fram þeirri hugmynd í Stúdentablaðinu að búnir verði til trjástígar og komið fyrir gosbrunni á háskólasvæðinu að enskri og bandarískri fyrirmynd (campus).
